06 · Equipo docente

Acompañámoste no teu percorrido

Ilda Freire durante unha práctica de Contact Improvisación

Ilda Freire

O meu traballo móvese entre o Contact Improvisación, a investigación do movemento e a terapia manual. Interésanme especialmente as calidades do toque, a escoita e as posibilidades creativas que aparecen cando nos relacionamos a través do corpo. Atopo no Contact Improvisación un espazo onde explorar como nos comunicamos, como tomamos decisións e que podemos descubrir cando nos movemos xuntes.

Ver bio completa

En 2014 mudeime a Pequín, onde vivín durante seis anos. Foi unha etapa de descubrimento e transformación durante a que fun deixando atrás a arquitectura para dedicarme á danza, á somática e ao Contact Improvisación.

Durante eses anos cocreei The Feathers Project xunto a Bojun Hu e Emily Wong, un proxecto interdisciplinario no que explorabamos o encontro entre danza, instalacións artísticas e prácticas somáticas. Tamén participei en diferentes creacións escénicas presentadas no Wuzhen Theater Festival, no Yinchuan Theater Festival e no Beijing Minsheng Art Museum.

A miña comprensión do Contact Improvisación foise forxando a través de festivais e obradoiros con numerosas docentes, así como de programas de formación continuada en Espacio FCI e Earthdance. Tamén me formei en Masaxe Tradicional Chinesa e Shiatsu, e actualmente curso o Plan de Formación Profesional en danza e creación fundado por Carmen Senra. A Capoeira Angola e a meditación Vipassana son outras dúas prácticas que acompañaron e enriqueceron o meu percorrido.

En 2020 cocreei, xunto a María Cantero, CuerpoColectivo, unha plataforma de investigación en danza, somática e artes escénicas. Ese mesmo ano puxemos en marcha Espacio A Rigueira e BRINCA – Galicia Contact Festival, dous proxectos que codiriximos durante catro edicións e a través dos cales continúo impulsando o intercambio artístico e a creación de comunidade na Galicia rural.

A terapia manual influíu profundamente na miña maneira de achegarme ao movemento e ao contacto. Máis alá dos coñecementos de anatomía e biomecánica, ensinoume a prestar atención ao que sucede a través do toque, a escoitar coas mans e a recoñecer as distintas formas en que un corpo pode responder a outro. Esta sensibilidade atravesa tamén a miña maneira de ensinar. Nas miñas clases busco xerar espazos de confianza, libres de discriminación e xuízo, onde preparar o corpo e a atención para a improvisación. Gústame traballar con imaxes e propostas que esperten a curiosidade e nos permitan investigar, descubrir e desenvolver a nosa propia danza.

Interésame tamén a dimensión política do que sucede entre os corpos. O contacto nunca ocorre á marxe das nosas experiencias, identidades e relacións de poder. Desde Queer-in CI, unha proposta que desenvolvo actualmente en Madrid, utilizo preguntas e textos para investigar como o xénero e outros eixes de poder atravesan a nosa maneira de ocupar o espazo, tocar e relacionarnos. Desde unha perspectiva queer e transfeminista, busco cuestionar algunhas das dinámicas que damos por sentadas, imaxinar outras formas de estar xuntes e contribuír a unha maior participación e visibilidade de corpos e identidades disidentes dentro do Contact Improvisación.

Actualmente imparto clases e obradoiros de Contact Improvisación en Madrid e en encontros internacionais, principalmente na China, nos Estados Unidos, en Portugal e en España.

Saima Tebini durante unha práctica de Contact Improvisación

Saima Tebini Marcos

O Contact Improvisación chegou á miña vida como unha práctica desde a que seguir facéndome preguntas, como «que outras formas de estar xuntes podemos imaxinar?». Interésame ese espazo que aparece cando deixamos de saber exactamente que vai pasar e nos damos tempo para descubrilo. É un espazo, ás veces, utópico, pero facémolo real durante un tempo e o que acontece transfórmanos.

Ver bio completa

Desde 2004 dedícome ás artes do movemento e á improvisación. Desde os 14 anos ata os 23 fun bailarina de bailes de salón de competición internacional, formando parte da WDSF (World DanceSport Federation), e adestrando e vivindo en Italia durante varios anos no Pala Danze, Centro Deportivo de Danza, en Molinella (Italia).

En 2014 volvín a España e entrei na RESAD (Real Escuela Superior de Arte Dramático de Madrid), onde me graduei en Interpretación, na especialidade de Teatro do Xesto, en 2018. Ese último ano estudeino na HAMU Academy of Performing Arts de Praga, onde desenvolvín o meu proxecto final de carreira, Libres, unha peza de Teatro Físico sobre Emma Goldman e a emancipación das mulleres, a través da Expresión Corporal e do Método Schinca.

Durante eses anos actuei e colaborei como actriz de teatro físico con diferentes artistas e directores.

Mentres o activismo foi gañando cada vez máis presenza na miña vida, as artes escénicas interesábanme máis nas rúas ca nos teatros. Formeime así en Teatro Social con La Rueda, en Madrid, e creamos un proxecto comunitario en Ceuta e Tánxer con mulleres transfronteirizas e nenas e nenos en situación de risco. Atravesada pola miña propia experiencia, formeime en Psicoterapia Humanista Gestalt con perspectiva feminista.

En 2021 comecei a afondar no CI en Madrid, na escola de FCI, e desde entón continuei estudando e practicando de maneira regular en diferentes eventos e encontros. O CI converteuse nunha parte relevante da miña vida e, a través desta práctica, viaxei a diferentes cidades e países, achegándome a distintas culturas, formas de conectar coa natureza e maneiras de relacionarnos cos nosos corpos.

Neste percorrido, algunhas das persoas que máis influíron na miña práctica foron Linda Bufali, Yaniv Mintzer, Kirstie Simson, Anya Cloud, Sasha Dodo, Dolores Dewhurst-Marks, Kira Kirsch e Ray Chung.

Desde 2023 organizo e facilito eventos e clases de CI e actualmente colaboro con diferentes proxectos internacionais. Ao mesmo tempo, dei vida a CI Retreat Galicia: retiros de Contact Improvisación na natureza con profesorado convidado.

En Galicia interésame especialmente xerar espazos onde a práctica poida convivir coa natureza, a vida rural e a construción de comunidade. Este segue sendo o meu desexo.

Actualmente interésanme os programas de longa duración, onde se poida dar o tempo para o afondamento e a integración da práctica como escola de vida. Investigo como crear espazos onde poidamos baixar o ritmo, corregularnos, escoitar o que acontece e recuperar a capacidade de xogar, improvisar, confiar, conectar e estar presentes a través de prácticas somáticas e da investigación do noso propio corpo en movemento.